أثار إعلان المخرج محمد سامي اعتزاله الإخراج الدرامي التلفزيوني حالة واسعة من الجدل في الأوساط الفنية والإعلامية، هذه الخطوة دفعت العديد من النجوم في الوسط الفني للتعبير عن دعمهم له، وكان أبرزهم الفنان تامر حسني الذي وجه له رسالة دعم مؤثرة.

ونشر تامر حسني تعليقاً مطولاً على رسالة اعتزال محمد سامي، قال فيه:

"أوعى يكون قرارك بسبب أي إحباط! يمكن في بعض المشاهد اللي الناس انتقدتها، وأنا شخصياً استغربتها شوية، لكن ده لا ينفي إنك قدمت أعمالا عظيمة ومؤثرة. مفيش مخرج في مصر نجح في كل أعماله بدون استثناء زيك، والحظ محالفكش في عمل أو اثنين فقط على مدار 14 سنة، ودي حاجة مينفعش الجمهور ينساهالك".

كما تحدث حسني أبرز النجاحات التي حققها سامي على مدار مشواره الفني، معلقاً:

"مسلسل (آدم) جمع المصريين والعالم العربي قدام الشاشة، و(سبق الإصرار) و(حكاية حياة) نقلوا الدراما المصرية لديكورات وإخراج مختلف، وبعدها (الأسطورة)، و(البرنس)، و(جعفر العمدة) اللي حققوا أعلى نسب مشاهدة، وآخرهم (نعمة الأڤوكاتو) و(إش إش) و(سيد الناس)."

وواصل تامر رسالته قائلًا: "هزعل منك لو هتمشي محبط وأنت أنجح حد.. الشجرة الخضراء الكبيرة ممكن يطلع فيها ورق أصفر بسيط، بس ده لا يغير من حجمها، وكل الناجحين بيتعرضوا للنقد".

وأكمل: "الناس اللي بتنتقدك هما نفسهم اللي بيتابعوا أعمالك بكل تفاصيلها، وده دليل على نجاحك وتأثيرك."

واختتم حسني رسالته بدعمه الكبير لسامي، على خطوة السفر، وقال: "سافر وكمل حلمك وأنت منتصر بتاريخك، متسمحش للحزن ينسيك نجاحاتك، وإوعى الزعل من بعض المشاهد يخليك تنسى أنت قدمت إيه للدراما، ربنا ينور طريقك، وواثق إنك هترجع أقوى من الأول".

وأنهى تامر رسالته بكلمات مؤثرة: "هفضل أخوك الكبير، وفي ضهرك طول العمر، يا بطل".